Обраќање за бруцошите на Американ Колеџ

Почитувани професори, гости,
и нови студенти,

Ми претставува особена чест и задоволство да ви се обратам како нови студенти на Универзитетот Американ Колеџ Скопје.
Јас сум претставник на Деловниот Совет на Универзитетот. Работам како генерален директор на КБ Прво пензиско Друштво - друштво кое управува со парите на идните пензионери во Македонија. На некој начин, јас го отсликувам Вашиот иден работодавач, човек кој ќе ви ја понуди вашата прва работа.
Вам ви претстои најубавиот дел од вашиот живот. Младоста си носи своја специфичност и возбудливост. Светот е пред Вас. Живејте го со полн здив-полни плуќа!
Но, сепак, тие моменти на романтизам, идеализам, и непокорност, несмеат да ви ја замаглат целта. Што е целта?
Целта, според мене, е да можеш да создаваш во областа што навистина ти лежи, да правиш додадена вредност. Ако би го искористил речникот на Ворен Бафет, најпознатиот инвеститор на светот, кој вели: ЈАС СУМ СРЕЌЕН ЧОВЕК ЗАТОАШТО СЕКОЕ УТРО - ПОТСКОКНУВАМ КОГА ОДАМ НА РАБОТА!
Зарем тоа не е убава цел?
За жал, таа цел за многумина од нашите сограѓани - не е реалност! Не дозволувајте истото да ви се случи и на вас. Убавината, е во тоа што секој индивидуално си ја крои судбината,целта-да го најдеме она што уживаме да го работиме.
Денеска живееме во глобален свет. Македонија е дел од тој свет. Некои наши тукашни сограѓани работат за фирми од Холивуд, други добиваат нарачки од Шведска, а трети испорачуваат стоки или услуги на Германија, Јапонија, Австралија. Не заборавајте дека во Кина секоја година има 7 милиони нови дипломирани студенти кои истрчуваат на полето за натпревар, на Гоцевото рамноправно поле за натпревар! Каде се студентите од другите замји?! Како ти, како ти, ќе направиш разлика, ќе се издвоиш, ќе бидеш подобар или подобра, во таква консталација?
За крај, од искуство, би издвоил 3 нешта како совет, или тајни ако сакате.
- Секогаш давајте повеќе отколку што се очекува од вас. Underpromise and overdeliver!
- Волунтирајте и добијте што е можно повеќе искуства! За илустрација, денеска, во Македонија преку една глобална невладина организација доаѓаат волунтери од Америка/Британија/Канада да земат учество во активно градење на куќи за семејства со потреба во ВЕЛЕС(ХАБИТАТ ФОР ХЈУМАНИТИ).
Зошто? Утре да добијат подобро работно место, меѓудругото. Јас волунтирав во неколку фирми додека студирав. Тоа искуство, не некој начин, ме издвои од другите, ми помогна да видам што ме интересира, што сакам и дојдов до тука!
Практичната работа е најголемата некажана тајна на вашиот студенски живот. Немојте да ја прокоцкате таа шанса.
- Крајно, би ви препорачал да ги гледате работите позитивно. Чашата е секогаш полуполна наместо полупразна.
Верувајте во вашиот инстинкт, паѓањето е дел од растот, и бидете свои без предрасуди или оптоварувања.
Со среќа и благодарам!